Search

Ang Ekonomiya ng Pilipinas, Noon at Ngayon

Ang Ekonomiya ng Pilipinas, Noon at Ngayon

Maraming katanungan ang bumabalot sa isipan ng bawat Pilipino kung pag-uusapan ang ekonomiya ng Pilipinas, lalo na ang mga hamon na kinakaharap ng bansa sa puntong ito kung saan kaliwa’t kanan ang mga kontrobersiya ng Pilipinas. Dumating na nga sa puntong kinukwestiyon na maging ng mga bansang kaalyado nito at mas lalo na ng mga bansang kanyang kakumpitensya. Kung makikinig ka sa mga balita sa radyo at telebisyon, halos natabunan na ng mga negatibong kontrobersiya ang mga balita tungkol sa ekonomiya ng Pilipinas, na halos hindi na mapansin ang positibong mga balita na mayroon parin ang bansang ito. Sa madaling salita, kamusta na nga ba ang ekonomiya ng Pilipinas?

Una sa lahat, nararapat lamang na mapalawak ang kaisipan ng bawat Pilipino kung anong uri ng ekonmiya mayroon ang bansang ito mula pa noong mga nakalipas na taon hanggang sa taong kasalukuyan.

Anong uri ng ekonomiya mayroon ang Pilipinas?

Ang Pilipinas ay bahagi ng Timog Silangang Asya. Ang antas ng pasahod sa Pilipinas ay nasa lower middle income o mababang gitnang sahod. Ayon sa PPP o Purchasing Power Parity, ang GDP o Gross Domestic Product sa Pilipinas noong 2013 ay nasa 3,383 dolyar na nasa ika-138 na puwesto sa buong mundo at mas mababa pa sa mga bansang nasa Timog Silangang Asya katulad ng mga bansang Brunei, Thailand, Singapore at Malaysia. Sa madaling-salita, ang Pilipinas ay mas mahirap pa sa mga bansang nabanggit. Ayon sa PPP ang GDP ay isang paraang gamit ng mga ekonomista upang matukoy o masukat ng tama ang mga bansang mahihirap. Ito rin ay naghahambing ng mga pagkakaiba pagdating sa pamantayan ng pamumuhay ng bawat bansa sapagkat isinasaalang-alang nito ang mga gastusin sa pamumuhay at mga datos ng implasyon o presyo ng mga bansa sa pangkalahatang kategorya.

Ayon sa mga pagsasaliksik, mahirap mamuhunan ng negosyo sa Pilipinas lalo’t nasa ika-138 na pwesto ang bansa sa buong mundo. Samantala, ayon naman sa Corruption Perceptions Index, ang Pilipinas ay nasa ika-105 na pwesto sa 176 na bansa sa buong mundo na nangangahulugan lamang na may napaka-taas na lebel ng korusyon sa Pilipinas. Ang natanging mataas na datos lamang sa Pilipinas ay ang hindi pantay na pasahod sa mga manggagawa ng mga naglalakihang kumpanya na nagbubunga ng hindi matawarang kahirapan sa bansang ito.



Ang mga dahilan ng bahagyang pag-angat ng ekonomiya ng PIlipinas ngayon

Nangyari lamang ang bahagyang paglago ng ekonomiya ng Pilipinas sa kasalukuyan dahil sa mga sektor ng serbisyo gaya ng mga industriya ng telekomunikasyon, real estate na suportado ng mga remittance o mga perang pinapadala ng mga OFW sa kanilang mga pamilya rito sa Pilipinas, semikonduktor at higit sa lahat ang pag-usbong ng mga BPO o Business Processing Outsourcing na namumuhunan rito sa Pilipinas. Itong mga sektor na ito na nagpa-angat bahagya ng ekonomiya ng PIlipinas ay naging dahilan rin kung bakit mayroong hindi pantay na pasahod at maling kalidad ng trabaho na hindi napagbuti sa mga panahong nagdaan hanggang sa kasalukuyan. Ang mga sektor na mas lilikha pa sana ng mas maraming trabaho katulad ng pagmamanupaktura at agrikultra ay lalong tumatamlay na nagdudulot ng karagdagang kahirapan lalo na sa mga taong hindi naman nakapagtapos ng edukasyon.

Ang epekto ng iba’t ibang administrasyon sa ekonomiya ng Pilipinas

Ferdinand Marcos (1965-1986) – Sa ilalim ng pamumuno ni Ferdinand Marcos ay ang mga taong nagkaroon ng talamak na korupsyon at pabago-bagong kondisyon sa politika dahil sa maling pangangasiwa sa ekonomiya ng bansa. Ito ang kauna-unahang nakaranas ng napaka-negatibong pag-unlad. Ang Pilipinas ay nasadlak ng lubos sa krisis pang-ekonomiya dahil narin sa sinasabing mga naging gastos ni Marcos ng mga pondo ng pamahalaan para sa kanyang muling pagtakbo bilang pangulo.

Corazon Aquino (1986-1992) – Mula ng siya ay nahalal kanya agad tinugunan ang pandayuhang utang na humigit kumulang 28 bilyong dolyar na nalikom ni Marcos. BInayaran ng administrasyong Aquino ang 4 na bilyong dolyar ng 28 bilyong dolyar na utang ng Pilipinas ngunit humiram rin ang administrasyong Aquino ng 9 na bilyon na nagpataas pa ng 5 bilyong dolyar. Ang ekonomiya ng Pilipinas ay bahagyang lumago ng 3.4% sa kanyang unang taon bilang Presidente ngunit nagsanhi naman ng pagtigil sa paglago nito ang pagtatangkang rebelyon noong 1989.

Fidel Ramos (1992-1998) – Sa ilalim ng pamumuno ni Ramos ay nakapagtala ng paglago ng GDP ng 3.1%. Nagkaroon ng reporma ng mga batas upang akitin ang pamumuhunan ng mga dayuhan. Ginawang pribado ang ilang mga mahahalagang industriya at binuwag ang mga monopolyo. Subalit, nakapagtala ang Pilipinas ng pinakamataaas ng datos sa pagtakas sa pagbabayad ng buwis sa Asya. Ang implasyon ay bumagsak sa 5.9% mula sa dating 9.1% noong 1995. Samantalang ang piso naman ay bumagsak sa P40.89 kada dolyar sa P29.47 kada dolyar.

Joseph Estrada (1998-2001) – Ito ang isa sa pinka-kontrobersyal na administrayon sapagkat sa ilalim ng pamumuno ni Estrada, ang kanyang administrasyon ay inakusahan ng korupsyon at inkompetensya na nagdulot ng kawalang tiwala at gana ng mga imbestor na dayuhan. Dumagdag pa ang mga pagdukot, pambobomba at pabago-bagong klima sa pagbagsak ng ekonomiya ng bansa.

Gloria Arroyo (2001-2010) – Sa ilalim ng pamumuno ni Arroyo, ang paglago ng GDP ng Pilipinas ay 4.7% ngunit sa kabila ng paglago ay ang paglala pa ng kahirapan ng bansa. Nagpakita ng 5.4% ng paglago ng ekonomiya noong 2006 ngunit bumagsak rin ang ekonomiya dahil sa mga bagyong dinanas ng Pilipinas. Tumaas rin ang populasyon ng Pilipinas na naging sanhi ng mas malala pang kahirapan.

Benigno Aquino III (2010-2015) – Ang datos ng paglago ng GDP ng Pilipinas ay 6.8% noong 2012 na sinasabing ikalawang pinakamataas sa buong Asya. Sinasabing ang naging dahilan ng paglago ng ekonomiya ng Pilipinas ay dahil sa mga hakbang na isinagawa ni Aquino III pagdating sa pagsugpo ng korupsyon. Sa kabilang banda, wala namang naging pagbabago pagdating sa kahirapan ng bansa sapagkat ang nanatiling maunlad lamang ay iyong mga may mauunlad ng pamumuhay at hindi ang mga kapus-palad. Ang kawalang trabaho ay mas tumaas mula Setyembre 2013 na may 21.7% at Disyembre 2013 na may 27.5%.

Ang mga nasabing pamumuno ay may iba’t-ibang datos na naitala sa ilalim ng kanilang pamamahala. Halos pare-parehong hindi nagtagumpay na mapataas ang kalidad ng ekonomiya ng Pilipinas na sadya namang nakakalungkot isipin. Ngayon, ang sambayanang Pilipino ay umaasa na ang kasalukuyang administrasyon ay makakatulong ng malaki upang mapalago ang ekonomiya ng Pilipinas ng hindi na kailangan pang mayurakan ang pangalan ng Republika ng Pilipinas. Hindi masamang umasa, ngunit masamang iasa ang lahat sa iisang tao lamang. Kung nais mapalago ang ekonomiya, kailangang magsimula ito sa sarili.

Gaano kapakipakinabang ang artikulong ito?

Ang Ekonomiya ng Pilipinas, Noon at Ngayon
4 (80%) 8 votes